Sinopse
As comadres camufladas de “Pititas“, infíltranse no espazo público co pretexto de realizar unha colecta benéfica. Pronto revelan o seu auténtico obxectivo que é o de poñer en evidencia algunhas das inxustizas sexistas coas que convivimos día a día, e cuestionar a persistencia dos seus valores no pensamento hexemónico actual.
É unha peza de temática feminista, composta por diferentes escenas que tratan sobre os micromachismos que pouco a pouco nos van minando dende pequenas. Foi creada para poder adaptarse a lugares específicos non convencionais que dispoñan de boa visibilidade para o público e non requiran de excesivas necesidades técnicas.
“Comadres en acción” é un espectáculo de 35 minutos de duración, para público adulto e adolescente a partir de 14 anos, dirixido por Gena Baamonde e interpretado por Chelo do Rejo, Anabell Gago e María Ángeles Iglesias.
Matrioshka Teatro tamén ofrece un coloquio de 20 minutos entre as actrices e o público logo do espectáculo se o espazo o permite e é do interese da entidade programadora e do público.